(vovworld) - ຕອນບ່າຍວັນທີ 27/11, ຢູ່ຫ້ອງວ່າການລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດແບນຊິກ Bruno Angelet ເຂົ້າຢ້ຽມຂໍ່ານັບຕາມພິທີການທູດ ເນື່ອງໃນໂອກາດທີ່ທ່ານມາຮັບໜ້າທີ່ວຽກງານໃໝ່ຢູ່ຫວຽດນາມ. ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ ຫວຽດນາມ ຖືເປັນສຳຄັນ ແລະ ປາດຖະໜາຢາກຊຸກຍູ້ການພົວພັນຮ່ວມມືກັບແບນຊິກ ໃນທຸກຂົງເຂດ ເພື່ອຜົນປະໂຫຍດອັນແທດຈິງ ແລະ ການພັດທະນາລວມຂອງທັງສອງປະເທດ. ທ່ານນາຍົກລັດຖະມົນຕີໄດ້ສະເໜີວ່າ ຫວຽດນາມ ແລະ ແບນຊິກ ຄວນຂຸດຄົ້ນບັນດາຄວາມສາມາດບົ່ມຊ້ອນ, ທ່າແຮງຂອງກັນ ເພື່ອຊຸກຍູ້ການຮ່ວມມື ແລະ ພັດທະນາ, ພິເສດໃນຂົງເຂດເສດຖະກິດ, ການຄ້າ, ການລົງທຶນ, ວິທະຍາສາດ - ເຕັກໂນໂລຊີ, ການສຶກສາບຳລຸງສ້າງ. ທ່ານນາຍົກລັດຖະມົນຕີຢືນຢັນວ່າ: ລັດຖະບານຫວຽດນາມ ຈະສ້າງທຸກເງື່ອນໄຂສະດວກ ເພື່ອໃຫ້ທ່ານເອກອັກຄະລັດຖະທູດ Bruno Angelet ສຳເລັດໜ້າທີ່ວຽກງານຂອງຕົນຢູ່ຫວຽດນາມ.
ສ່ວນທ່ານເອກອັກຄະລັດຖະທູດແບນຊິກ Bruno Angelet ກໍຢືນຢັນວ່າ ຈະມານະພະຍາຍາມຈົນສຸດຄວາມສາມາດຂອງຕົນເພື່ອແນໃສ່ປະຕິບັດບົດບາດເປັນຂົວເຊື່ອມຕໍ່ມິດຕະພາບ ຊຸກຍູ້ການພົວພັນຮ່ວມມືລະຫວ່າງຫວຽດນາມ ແລະ ແບນຊິກ ໃນທຸກຂົງເຂດ, ພິເສດແມ່ນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ.