(vovworld) - ຕອນເຊົ້າວັນທີ 28/9, ໃນຂອບເຂດວາລະປະຊຸມຄົບຄະນະສະພາຊົນເຜົ່າຂອງສະພາແຫ່ງຊາດ, ໄດ້ດຳເນີນກອງປະຊຸມສຳມະນາ “ບັນດາບັນຫາຊົນເຜົ່າສ່ວນໜ້ອຍຕ້ອງໄດ້ຮັບການຄົ້ນຄວ້າປັບປຸງໃນລັດຖະທຳມະນຸນປີ 1992”. ກ່າວຄຳເຫັນທີ່ວາລະປະຊຸມ, ທ່ານປະທານສະພາຊົນເຜົ່າ Ksor Phuoc ຊີ້ແຈ້ງວ່າ; ໃນໄລຍະຜ່ານມາ, ສະພາຊົນເຜົ່າຂອງສະພາແຫ່ງຊາດ, ບັນດາກຳມາທິການສະພາແຫ່ງຊາດໄດ້ສະຫຼຸບການປະຕິບັດລັດຖະທຳມະນຸນປີ 1992 ຕາມບົດບາດ, ໜ້າທີ່ເຊິ່ງກົດໝາຍກຳນົດ. ບັນດາການສຳມະນາ, ກອງປະຊຸມວິທະຍາສາດຫຼາຍຄັ້ງກ່ຽວກັບລັດຖະທຳມະນຸນ, ການປັບປຸງລັດຖະທຳມະນຸນ ແລະ ປະຕິບັດລັດຖະທຳມະນຸນ ໄດ້ສະແດງໃຫ້ເຫັນຄຸນຄ່າ, ບົດບາດ ແລະ ຄວາມໝາຍຂອງລັດຖະທຳມະນຸນ ໃນການພັດທະນາປະເທດຊາດ. ບັນດາສິດເສລີເປັນພື້ນຖານຂອງຜົນລະເມືອງເວົ້າລວມ, ບັນດາເຜົ່າສ່ວນໜ້ອຍເວົ້າສະເພາະ ໄດ້ຮັບການປົວແປງ ແລະ ຍົກສູງຂຶ້ນຢ່າງບໍ່ຢຸດຢັ້ງ. ທີ່ກອງປະຊຸມສຳມະນາ, ບັນດາສະມາຊິກໄດ້ພິຈາລະນາໝາກຜົນທີ່ບັນລຸໄດ້ໃນການປະຕິບັດບັນດາຂໍ້ກຳນົດຂອງລັດຖະທຳມະນຸນປີ 1992, ປຶກສາຫາລື, ເຮັດແຈ້ງເນື້ອໃນບັນຫາສາມັກຄີບັນດາເຜົ່າ, ສາສະໜາຕາມລັດຖະທຳມະນຸນປີ 1992, ວຽກງານໂຄສະນາສຶກສາ, ສະໜອງຂໍ້ມູນຍົກສູງສະຕິຄວາມຮັບຮູ້, ຄວາມຮູ້ດ້ານກົດໝາຍໃຫ້ແກ່ປະຊາຊົນເຜົ່າສ່ວນໜ້ອຍ… ກອງປະຊຸມສຳມະນາສືບຕໍ່ໄດ້ປະກອບສ່ວນເຂົ້າໃນການສ້າງ, ປັບປຸງລະບົບກົດໝາຍ, ນະໂຍບາຍທີ່ກ່ຽວຂ້ອງເຖິງປະຊາຊົນເຜົ່າສ່ວນໜ້ອຍໃຫ້ບໍລິບູນ, ສ້າງເງື່ອນໄຂໃຫ້ຊາວເຜົ່າສ່ວນໜ້ອຍປະຕິບັດສິດດ້ານການເມືອງ, ເສດຖະກິດ, ການສຶກສາ, ສາທາລະນະສຸກ, ວັດທະນະທຳ, ສັງຄົມ, ປ້ອງກັນຊາດປ້ອງກັນຄວາມສະຫງົບເປັນຢ່າງດີ.