(vovworld) - ພາຍຫຼັງການເຈລະຈາຢ່າງເປີດອົກເປີດໃຈ ແລະ ໄວ້ເນື້ອເຊື່ອໃຈ ຕອນເຊົ້າວັນທີ 25/11, ທ່ານປະທານປະເທດ ເຈືອເຕີນຊາງ ແລະ ທ່ານປະທານາທິບໍດີເຢຍລະມັນ Joachim Gauck ໄດ້ມີການພົບປະກັບນັກຂ່າວພາຍໃນປະເທດ ແລະ ສາກົນ. ຕາມທ່ານປະທານປະເທດ ເຈືອງເຕີນຊາງ ແລ້ວ, ທີ່ການເຈລະນາ, 2 ຝ່າຍໄດ້ເຫັນດີເພີ່ມທະວີການແລກປ່ຽນຄະນະຜູ້ແທນ ແລະ ການພົບປະທຸກຂັ້ນ, ສືບຕໍ່ຜັນຂະຫຍາຍບັນດາກົນໄດ້ຮ່ວມມື 2 ຝ່າຍເຊິ່ງໄດ້ຮັບການສ້າງຕັ້ງ. 2 ຝ່າຍເຫັນດີຍູ້ແຮງການພົວພັນຮ່ວມມືລະຫວ່າງ 2 ປະເທດບົນເວທີປາໄສພາກພື້ນ ແລະ ສາກົນ ແລະ ກໍຕາມທ່ານປະທານປະເທດແລ້ວ, 2 ຝ່າຍໄດ້ເຫັນດີສ້າງເງື່ອນໄຂສະດວກໃຫ້ວິສາຫະກິດ 2 ປະເທດເພີ່ມທະວີການຮ່ວມມື, ລົງທຶນ, ດຳເນີນທຸລະກິດ ເພື່ອຕອບສະໜອງຄວາມຕ້ອງການຂອງແຕ່ລະປະເທດ, ໂດຍສະເພາະແມ່ນໃນສະພາບທີ່ສັນຍາການຄ້າເສລີລະຫວ່າງຫວຽດນາມ ແລະ ສະຫະພາບເອີລົບ (EU) ໃກ້ຈະໄດ້ຮັບການລົງນາມ. ນີ້ແມ່ນພື້ນຖານສຳຄັນເພື່ອຊຸກຍູ້ການພົວພັນຮ່ວມມືລະຫວ່າງ ຫວຽດນາມ ແລະ ເຢຍລະມັນ ກໍຄືກັບພາກພື້ນ EU.
“ເອີລົບໄດ້ກາຍເປັນຄູ່ຮ່ວມມືອັນດັບໜຶ່ງຂອງຫວຽດນາມ ກ່ຽວກັບເສດຖະກິດ, ການຄ້າ ແລະ ການລົງທຶນ. ຫວຽດນາມ ແລະ EU ໄດ້ດຳເນີນການເຈລະຈາເພື່ອກ້າວໄປເຖິງການລົງນາມໃນ FTA ເປັນເວລາຫຼາຍປີແລ້ວ. ເມື່ອສັນຍາໄດ້ຮັບການຮັບຮອງເອົາ, ຫວຽດນາມ, EU ເຊື່ອໝັ້ນວ່າ ດ້ວຍການພົວພັນອັນດີິງາມໃນຫຼາຍຂົງເຂດຄືການຄ້າ, ການລົງທຶນ ໃນໄລຍະຈະມາເຖິງ ແນ່ນອນວ່າ ການຮ່ວມມືດ້ານການຄ້າ 2 ຝ່າຍຈະໄດ້ຮັບການພັດທະນາຢ່າງວ່ອງໄວ. ບົນພື້ນຖານຂໍ້ຕົກລົງ FTA, 2 ຝ່າຍຕັດສິນໃຈຍົກວົງເງິນການຄ້າຫວຽດນາມ - ເຢຍລະມັນ ຂຶ້ນທົບ 2 ເທົ່າ ໃນໄລຍະ 5 ປີຈະມາເຖິງ. ຂ້າພະເຈົ້າເຊື່ອໝັ້ນວ່າ, ການພົວພັນລະຫວ່າງຫວຽດນາມ - ເຢຍລະມັນ ເວົ້າສະເພາະ ແລະ ຫວຽດນາມ - EU ເວົ້າລວມ ຈະມີບາດກ້າວພັດທະນາໄໝ່ອັນດີງາມ”.
ແລະກໍຢູ່ທີ່ການປະຊຸມຂ່າວ, ທ່ານປະທານປະເທດ ເນັ້ນໜັກວ່າ, 2 ຝ່າຍໄດ້ແລກປ່ຽນ ແລະ ເຫັນດີເປັນເອກະພາບຕໍ່ຄວາມສຳຄັນຂອງການຮັກສາສັນຕິພາບ, ຄວາມສະຫງົບປອດໄພ, ຊຸກຍູ້ການຮ່ວມມື ແລະ ພັດທະນາຢູ່ໃນໂລກ. ການນຳ 2 ປະເທດໄດ້ເຫັນດີນຳກັນໂດຍຖືວ່າ, ການຂັດແຍ້ງກັນຢູ່ທະເລຕາເວັນອອກ ຕ້ອງໄດ້ຮັບການແກ້ໄຂໂດຍສັນຕິວິທີ, ເໝາະສົມກັບກົດໝາຍສາກົນ, ສົນທິສັນຍາຂອງສະຫະປະຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982 ແລະ ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC).
ກ່າວຄຳເຫັນທີ່ການປະຊຸມຂ່າວ, ທ່ານປະທານາທິບໍດີເຢຍລະມັນ Joachim Gauck ໃຫ້ຮູ້ວ່າ, ສາທາລະນະລັດສະຫະພັນເຢຍລະມັນ ແລະ ປະຊາຄົມເອີລົບ ແບ່ງປັນບັນດາທັດສະນະຂອງຫວຽດນາມ ກ່ຽວກັບບັນຫາທະເລຕາເວັນອອກ. ຕາມທ່ານປະທານາທິບໍດີ Joachim Gauck ແລ້ວ, ສາທາລະນະລັດສະຫະພັນເຢຍລະມັນ ໄດ້ສະໜັບສະໜູນຫວຽດນາມ ສ້າງລັດແຫ່ງອຳນາດນິຕິບັນຍັດ ແລະ ພ້ອມແລ້ວທີ່ຈະໜູນຊ່ວຍຫວຽດນາມ ພັດທະນາຢ່າງຮອບດ້ານ.