(vovworld) - ໃນບົດກ່າວປາໄສທີ່ພິທີ ຜັນຂະຫຍາຍໂຄງການດຳເນີນງານແຫ່ງຊາດ “ບໍ່ມີໄພອຶດຫີວ“ ຕາມຂໍ້ລິເລີ່ມຂອງ ທ່ານເລຂາທິການໃຫຍ່ສະຫະປະຊາຊາດ (ສປຊ) ບານກິມູນ, ທ່ານນາຍົກລັດຖະມົນຕີ ຫງວຽນເຕີນຢຸງ ເນັ້ນໜັກວ່າ: ໂດຍເລີ່ມມາຈາກປະເທດທີ່ທຸກຍາກ, ຂາດທັນຍາຫານ, ດ້ອຍພັດທະນາ, ຫວຽດນາມໄດ້ປະຕິບັດແນວທາງປ່ຽນໃໝ່ ແລະ ບືນຕົວຂຶ້ນກາຍເປັນປະເທດພວມພັດທະນາ ດ້ວຍລາຍຮັບປານກາງ. ໃນສະພາບໂລກາພິວັດ, ກະສີກຳຫວຽດນາມ ພວມຕ້ອງຮັບມືກັບການທ້າທາຍໃຫຍ່ 2 ຢ່າງ, ນັ້ນແມ່ນ: ຄວາມສາມາດແກ່ງແຍ້ງ ແລະ ການກະທົບທີ່ຫຍໍ້ທໍ້ຈາກການຫັນປ່ຽນຂອງດິນຟ້າອາກາດ. ທ່ານນາຍົກລັດຖະມົນຕີ ຫງວຽນເຕີນຢຸງ ໃຫ້ຮູ້ວ່າ, ເພື່ອຮັບມືກັບການທ້າທາຍດັ່ງກ່າວ, ລັດຖະບານຫວຽດນາມພວມຜັນຂະຫຍາຍສອງລາຍການໃຫຍ່ກ່ຽວກັບການກໍ່ສ້າງຊົນນະບົດໃໝ່ ແລະ ສ້າງໂຄງປະກອບຂະແໜງກະສີກຳຄືນໃໝ່, ດ້ວຍບັນດາມາດຕະການຈຸດສຸມ. ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ:
“ຫວຽດນາມ ໃຫ້ຄຳໝັ້ນສັນຍາຈະສືບຕໍ່ສະໜັບສະໜູນ ແລະ ພ້ອມກັບ ສປຊ ໃນການປະຕິບັດບັນດາຄາດໝາຍພັດທະນາຢ່າງໝັ້ນຄົງ. ເລື່ອງຫວຽດນາມເຂົ້າຮ່ວມຂໍ້ລິເລີ່ມ “ບໍ່ມີໄພອຶດຫີວ“ນັ້ນ, ບໍ່ພຽງແຕ່ສະແດງໃຫ້ເຫັນຄວາມຮັບຜິດຊອບຂອງຫວຽດນາມ, ຕັ້ງໜ້າສະໜັບສະໜູນການເຄື່ອນໄຫວຕ່າງໆຂອງ ສປຊ ເທົ່ານັ້ນ, ຫາກຍັງເພື່ອຕອບສະໜອງຄວາມຮຽກຮ້ອງຕ້ອງການຂອງຫວຽດນາມ ອີກດ້ວຍ“.
ທ່ານນາຍົກລັດຖະມົນຕີ ຫງວຽນເຕີນຢຸງ ຍັງເນັ້ນໜັກວ່າ, ຫວຽດນາມພ້ອມແລ້ວທີ່ຈະແບ່ງປັນບົດຮຽນໃນການລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ການພັດທະນາກະສີກຳກັບບັນດາປະເທດພວມພັດທະນາ; ພ້ອມທັງຕີລາຄາສູງການຊ່ວຍເຫຼືອຢ່າງແທດຈິງ, ມີປະສິດທິຜົນນັບທັງດ້ານເຕັກນິກ, ບົດຮຽນໃນການຄຸ້ມຄອງດ້ານການເງິນຂອງບັນດາອົງການ ສປຊ, ບັນດາອົງການຈັດຕັ້ງສາກົນໃຫ້ແກ່ຫວຽດນາມ.
ສ່ວນທ່ານນາງ Pratibha Mehta, ຜູ້ປະສານງານປະຈຳ ສປຊ, ຫົວໜ້າຜູ້ຕາງໜ້າລາຍການພັດທະນາ ສປຊ ປະຈຳຫວຽດນາມ, ຕີລາຄາສູງບັນດາຜົນງານໃນການພັດທະນາເສດຖະກິດສັງຄົມຂອງຫວຽດນາມໄລຍະ 30 ປີ ຜ່ານມາ, ພິເສດແມ່ນຜົນແຫ່ງການປະຕິບັດບັນດາຄາດໝາຍພັດທະນາສະຫັດສະວັດ; ຫຼຸດຜ່ອນອັດຕາຄອບຄົວທຸກຍາກ. ບັນດາອົງການຂອງ ສປຊ , ບັນດາອົງການສາກົນໃຫ້ຄຳໝັ້ນສັນຍາສືບຕໍ່ໜູນຊ່ວຍຫວຽດນາມປະຕິບັດສຳເລັດຂໍ້ລິເລີ່ມນີ້ ກໍ່ຄືວິວັດການພັດທະນາຢ່າງໝັ້ນຄົງຂອງຫວຽດນາມ.