( vovworld ) - ວັນທີ 11/6, ກະຊວງການຕ່າງປະເທດລັດເຊຍໄດ້ອອກຖະແຫຼງການໂດຍຢືນຢັນວ່າ ມົດສະກູ ຈະມານະພະຍາຍາມຢ່າງສຸດຂີດ ເພື່ອບັນລຸໄດ້ການເຈລະຈາທີ່ສ້າງສັນໃນການພົບປະຂອງກຸ່ມ P5+1 ( ເຊິ່ງລວມມີ 5 ປະເທດປະຈຳສະພາຄວາມໝັ້ນຄົງສະຫະປະຊາຊາດແມ່ນລັດເຊຍ, ຈີນ, ອາເມລິກາ, ອັງກິດ, ຟລັງ ແລະ ພ້ອມກັບເຢຍລະມັນ ) ແລະ ອີຣານ ໃນລະຫວ່າງວັນທີ 18 – 19/6 ທີ່ຈະມາເຖິງຢູ່ນະຄອນຫຼວງມົດສະກູ, ປະເທດລັດເຊຍ. ຄຳຖະແຫຼງໄດ້ຢັ້ງຢືນວ່າ ເຂົ້າຮ່ວມການພົບປະທີ່ຈະມາເຖິງຢູ່ມົດສະກູ ນອກຈາກມີບັນດາຜູ້ຕາງໜ້າຂອງກຸ່ມ P5+1, ຍັງມີບັນດາຜູ້ຕາງໜ້າຂັ້ນສູງຂອງສະຫະພາບເອີລົບ ( EU ) ກ່ຽວກັບນະໂຍບາຍປ້ອງກັນຄວາມສະຫງົບ ແລະ ການຕ່າງປະເທດ, ທ່ານນາງ Catherine Ashton ແລະ ທ່ານເລຂາສະພາຄວາມໝັ້ນຄົງແຫ່ງຊາດອີຣານ, ທ່ານ Saeed Jalili, ຄຳຖະແຫຼງໃຫ້ຮູ້ວ່າ ບັນດາຝ່າຍຕາງໜ້າກຸ່ມ P5+1 ແລະ ອີຣານ ຈະປຶກສາຫາລືບັນດາຂໍ້ສະເໜີຢ່າງລະອຽດທີ່ໄດ້ສົ່ງເຖິງ ເຕເຣຣານ ພາຍຫຼັງຮອບເຈລະຈາຢູ່ Bagdad, ອີຣັກ ທີ່ຜ່ານມາ. ມົດສະກູ ປາດຖະໜາວ່າ ການພົບປະທີ່ຈະມາເຖິງຈະນຳມາເຊິ່ງຜົນງານຕ່າງໆຢ່າງຕັ້ງໜ້າ ຕາມທິດທີ່ບັນດາຝ່າຍແກ້ໄຂບັນດາຄວາມບໍ່ລົງລອຍກັນໃນປະຈຸບັນ ເພື່ອຫຍັບມໍເຂົ້າກັນກວ່າໃນບັນດາທັດສະນະຂອງຕົນ. ຄຳຖະແຫຼງກໍ່ເນັ້ນໜັກວ່າ ລັດເຊຍ ມີແຜນນະໂຍບາຍສະເໝີຕົ້ນສະເໝີປາຍໃນການຊອກຫາມາດຕະການແກ້ໄຂດ້ານການເມືອງ, ການທູດໃຫ້ແກ່ບັນດາບັນຫາທີ່ກ່ຽວຂ້ອງເຖິງໂຄງການນິວເຄຼຍທີ່ກໍ່ຄວາມໂຕຖຽງກັນຂອງອີຣານ ບົນພື້ນຖານເຄົາລົບເຊິ່ງກັນ ແລະ ກັນ ແລະ ຄິດໄລ່ເຖິງຜົນປະໂຫຍດຂອງກັນ.