ສະມາຄົມພຸດທະສາສະໜາຫວຽດນາມ ມອບເຂົ້າສານ 100 ໂຕນໃຫ້ແກ່ປະຊາຊົນ ໂມຊໍາບິກ
(VOVWORLD) - ວັນທີ 26 ພະຈິກ, ຢູ່ນະຄອນຫຼວງ Maputo, ໂມຊໍາບິກ, ພະອາຈານ ທິກດົ່ງເຫວ້, ຮອງຫົວໜ້າຄະນະພຸດທະສາສະໜາສາກົນ, ປະທານສະມາຄົມພຸດທະສາສະໜາຫວຽດນາມ ຢູ່ ມໍຊໍາບິກ ໄດ້ມອບເຂົ້າສານຈໍານວນ 100 ໂຕນ ເພື່ອຊ່ວຍເຫຼືອຜູ້ປະສົບເຄາະຮ້າຍຈາກພະຍຸເຂດຮ້ອນ Idai ແລະ Kenneth ທີ່ເກີດຂຶ້ນຢູ່ພາກກາງປະເທດນີ້ ເມື່ອເດືອນ ມີນາ ແລະ ເດືອນເມສາ ຜ່ານມາ.
ພະອາຈານ ທິກດົ່ງເຫວ້ ມອບເຂົ້າສານຈໍານວນ 100 ໂຕນ ເພື່ອຊ່ວຍເຫຼືອຜູ້ປະສົບເຄາະຮ້າຍຈາກພະຍຸເຂດຮ້ອນ Idai ແລະ Kenneth (ພາບ: TTXVN) |
ພະອາຈານ ທິກດົ່ງເຫວ້ ໄດ້ຝາກຄໍາຢື້ຢາມຖາມຂ່າວຂອງສູນກາງສະມາຄົມພຸດທະສາສະໜາ ແລະ ບັນດາອົງການກ່ຽວຂ້ອງຂອງຫວຽດນາມ ເຖິງອໍານາດການປົກຄອງ, ປະຊາຊົນປະຈໍາຖິ່ນ ແລະ ຫວັງວ່າເຂົ້າສານຈໍານວນ 100 ໂຕນນັ້ນ ຈະປະກອບສ່ວນຊ່ວຍເຫຼືອບັນດາຜູ້ປະສົບເຄາະຮ້າຍຫຼຸດພົ້ນອອກຈາກຄວາມຫຍຸ້ງຍາກໄດ້ສ່ວນໃດສ່ວນໜຶ່ງ.
ທ່ານນາງ Augusta Maita, ຜູ້ອໍານວຍການໃຫຍ່ ອົງການຄຸ້ມຄອງໄພທໍາມະຊາດສູນກາງຂອງ ໂມຊໍາບິກ ໄດ້ຝາກຄວາມຂອບອົກຂອບໃຈ ແລະ ຕີລາຄາສູງການໜູນຊ່ວຍອັນລໍ້າຄ່າ, ທັນການ ທັງດ້ານວັດຖຸ ແລະ ຈິດໃຈ ຂອງ ສູນກາງສະມາຄົມພຸດທະສາສະໜາຫວຽດນາມ, ລັດຖະບານ ແລະ ປະຊາຄົມພຸດທະສາສະນິກກະຊົນຫວຽດນາມ.