(vovworld) – ວັນທີ 18/8, ຫົວໜ້າຄະນະຕິດຕາມກວດກາຂອງ ສະຫະປະຊາຊາດ ຢູ່ ຊີຣີ (ຫຼື UNSMIS), ນາຍພົນ Babacar Gaye ໄດ້ກ່າວຜູກໂທດລັດຖະບານ ຊີຣີ ແລະ ກຳລັງລຸກຮື້ຂຶ້ນຢູ່ປະເທດນີ້ບໍ່ປົກປ້ອງສາມັນຊົນ. ກ່າວຄຳເຫັນຕໍ່ວົງການນັກຂ່າວຢູ່ Damascua, ທ່ານ Gaye ຢັ້ງຢືນວ່າ: “ທັງ 2 ຝ່າຍລ້ວນແຕ່ມີພັນທະທີ່ໄດ້ກຳນົດໃນກົດໝາຍມະນຸດສະທຳຂອງສາກົນ ແມ່ນຮັບປະກັນໃຫ້ສາມັນຊົນ ໄດ້ຮັບການປົກປ້ອງ. ແຕ່ເຖິງຢ່າງໃດກໍຕາມ, ບັນດາພັນທະນັ້ນບໍ່ໄດ້ຮັບຄວາມເຄົາລົບ”. ທ່ານ ກໍສະແດງຄວາມເສຍຫວັງ ຍ້ອນຄະນະຕິດຕາມກວດກາຂອງ ສະຫະປະຊາຊາດ ບໍ່ບັນລຸໄດ້ຄາດໝາຍຕົ້ນຕໍ ແມ່ນ ຢຸດຕິການປະທະກັນຢູ່ ຊີຣີ. ແຕ່ເຖິງຢ່າງໃດກໍຕາມ, ທ່ານຍັງໃຫ້ຮູ້ວ່າ: ສະຫະປະຊາຊາດ ຍັງຄົງໃຫ້ຄຳໝັ້ນສັນຍາປະກອບສ່ວນເຂົ້າໃນບັນດາຄວາມມານະພະຍາຍາມສັນຕິພາບຢູ່ ຊີຣີ ຜ່ານການຊຸກຍູ້ການໂອ້ລົມສົນທະນາ.