ສະຖານທີ່ເກີດເຫດ
(ພາບ: AP)
|
(vovworld) – ບັນດາເຈົ້າໜ້າທີ່ປ້ອງກັນຄວາມສະຫງົບ ແລະ ສາທາລະນະສຸກ ອີຣັກ ໃຫ້ຮູ້ວ່າ: ລູກລະເບີດໜ່ວຍໜຶ່ງຕົກຈາກເຮືອບິນສູ້ຮົບ Sukhoi ຂອງກອງທັບປະເທດນີ້ໂດຍບັງເອີນ ແລະ ລະເບີດຂຶ້ນຢູ່ທາງທິດຕາເວັນອອກຂອງນະຄອນຫຼວງ ແບກແດດ ເມື່ອວັນທີ 6/7, ເຮັດໃຫ້ຢ່າງໜ້ອຍສຸດມີ 7 ຄົນເສຍຊີວິດ ແລະ ອີກ 11 ຄົນຮັບບາດເຈັບ. ໂຄສົກຂອງກຳລັງປ້ອງກັນຄວາມສະຫງົບ ອີຣັກ, ພົນວາທີ Saad Maan ຮັບຮູ້ວ່ານີ້ແມ່ນຍ້ອນ “ບັນຫາດ້ານເຕັກນິກ”, ລູກລະເບີດໜ່ວຍໜຶ່ງໄດ້ຕົກໃສ່ເຮືອນ 3 ຫຼັງຢູ່ເຂດ Jadida ຂອງ ແບດແດດ, ໃກ້ກັບຖານທີ່ໝັ້ນຂອງທັບອາກາດ Rasheed.
ປີກ່ອນ, ອີຣັກ ໄດ້ຊື້ເຮືອບິນສູ້ຮົບ Sukhoi Su – 25 ຈາກ ລັດເຊຍ ແລະ ອີຣານ ເພື່ອເພີ່ມທະວີກຳລັງປ້ອງກັນອາກາດທີ່ອ່ອນດ້ອຍຂອງຕົນແນໃສ່ຮັບມືກັບອົງການລັດອິດສະລາມ (IS) ອ້າງຊື່ເອງ, ເຊິ່ງແມ່ນກຳລັງທີ່ພວມຄວບຄຸມເຂດດິນແດນທີ່ກ້ວາງໃຫຍ່ຢູ່ປະເທດເຂດອ່າວນີ້.