ທ່ານ ຫງວຽນຊວນຟຸກ ຢ້ຽມຢາມ ຫ້ອງການອົງການປະຈຳປະຕູຖານຂໍ້ມູນເອເລັກໂຕນິກຂອງ ລັດຖະບານ ຢູ່ນະຄອນ ດ່ານັ້ງ
(ພາບ:vtv.vn)
|
(vovworld) – ວັນທີ 8/3, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ລົງຢ້ຽມຢາມ ແລະ ເຮັດວຽກຢູ່ບໍລິສັດຫຸ້ນສ່ວນຕຳ່ແຜ່ນຕັດຫຍິບ 29/3 ແລະ ຫ້ອງການອົງການປະຈຳປະຕູຖານຂໍ້ມູນເອເລັກໂຕນິກຂອງ ລັດຖະບານ ຢູ່ນະຄອນ ດ່ານັ້ງ. ເມື່ອລົງຢ້ຽມຢາມ ແລະ ເຮັດວຽກຢູ່ບໍລິສັດຫຸ້ນສ່ວນຕຳ່ແຜ່ນຕັດຫຍິບ 29/3, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ຕີລາຄາສູງ ແລະ ຍ້ອງຍໍຊົມເຊີຍບັນດາຜົນງານທີ່ບໍລິສັດບັນລຸໄດ້ພາຍຫຼັງ 40 ປີແຫ່ງການພັດທະນາ ແລະ ເຕີບໃຫຍ່. ນີ້ແມ່ນຮູບແບບການຜະລິດ, ດຳເນີນທຸລະກິດ ທີ່ມີການຫັນປ່ຽນທ່ວງທັນກັບທ່າອ່ຽງພັດທະນາຂອງປະເທດຊາດ. ໄລຍະຈະມາເຖິງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ບໍລິສັດຄວນຄົ້ນຄ້ວາເພື່ອສ້າງຜະລິດຕະພັນໃຫ້ມີຫຼາຍຮູບຫຼາຍແບບ, ເປັນເຈົ້າການໃນການເຊື່ອມໂຍງກັບສາກົນຢ່າງວ່ອງໄວ, ເລິກເຊິ່ງ ແລະ ກ້ວາງຂວາງ.
ຢູ່ຫ້ອງການອົງການປະຈຳຂອງປະຕູຖານຂໍ້ມູນຂ່າວສານເອເລັກໂຕນິກຂອງ ລັດຖະບານຢູ່ນະຄອນ ດ່ານັ້ງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກເຖິງບົດບາດສຳຄັນຂອງສື່ສານ ໃນຍຸກປະຈຸບັນ, ດັ່ງນັ້ນປະຕູຖານຂໍ້ມູນຂ່າວສານເອເລັກໂຕນິກຂອງລັດຖະບານຕ້ອງແມ່ນໜຶ່ງໃນບັນດາຫົວໜ່ວຍນຳໜ້າໃນການເຜີຍແຜ່ແນວທາງ, ນະໂຍບາຍຂອງລັດຖະບານເຖິງປະຊາຊົນ.