(vovworld) - ວັນທີ 22/6, ຢູ່ສຳນັກງານສູນກາງພັກປະຊາຊົນປະຕິວັດລາວ, ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຊະສອຍ ໄດ້ໃຫ້ການຕ້ອນຮັບຄະນະຜູ້ແທນຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໂດຍທ່ານ Hoang Binh Quan, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ເປັນຫົວໜ້າຄະນະ ທີ່ພວມຢູ່ຢ້ຽມຢາມ ແລະ ເຮັດວຽກ ຢູ່ລາວ. ທີ່ການຕ້ອນຮັບ, ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຊະສອຍ ຕີລາຄາສູງບັນດາການປະກອບສ່ວນຢ່າງຕັ້ງໜ້າຂອງ 2 ຄະນະໃນການຊຸກຍູ້ການຮ່ວມມືຢ່າງຮອບດ້ານລາວ - ຫວຽດນາມ, ຫວັງວ່າ ຄະນະພົວພັນຕ່າງປະເທດສູນກາງ ສືບຕໍ່ສົມທົບກັນຢ່າງແໜ້ນແຟ້ນ, ເພີ່ມທະວີການແລກປ່ຽນຂໍ້ມູນຂ່າວສານ, ບົດຮຽນ, ຮ່ວມມື ເພື່ອຈັດຕັ້ງບັນດາການເຄື່ອນໄຫວໃນ “ປີແຫ່ງຄວາມສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2012”. ສ່ວນທ່ານ Hoang Binh Quan ຢືນຢັນວ່າ: ຫວຽດນາມ ຈະເຮັດຈົນສຸດຄວາມສາມາດຂອງຕົນພ້ອມກັບຝ່າຍ ລາວ ຮັກສາ ແລະ ເພີ່ມພຸນຄຸນສ້າງໃຫ້ແກ່ສາຍພົວພັນສາມັກຄີແບບພິເສດຫວຽດນາມ - ລາວ ໃຫ້ນັບມື້ນັບພັດທະນາ ກ້າວເຂົ້າສູ່ລວງເລິກ, ມີປະສິດທິຜົນ ແລະ ແທດຈິງ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ ແລະ ຢູ່ໃນໂລກ.
ແລະກໍໃນວັນດຽວກັນ, ຄະນະຜູ້ແທນຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໄດ້ມີການເຈລະຈາ ກັບຄະນະຜູ້ແທນຄະນະພົວພັນຕ່າງປະເທດສູນກາງພັກປະຊາຊົນປະຕິວັດ ລາວ. ໃນຂອບເຂດການຢ້ຽມຢາມ ແລະ ເຮັດວຽກ ຢູ່ລາວ, ຄະນະຈະມີການເຮັກວຽກກັບບາງກະຊວງ, ຂະແໜງການທີ່ກ່ຽວຂ້ອງຂອງ ລາວ ກ່ຽວກັບສະພາບການປະຕິບັດຂໍ້ຕົກລົງຂັ້ນສູງ ແລະ ສັນຍາຮ່ວມມືເສດຖະກິດ, ວັດທະນະທຳ, ວິທະຍາສາດ, ເຕັກນິກ ຫວຽດນາມ - ລາວ 2012, ກວດກາ ແລະ ຊຸກຍູ້ການຜັນຂະຫຍາຍປະຕິບັດບາງກິດຈະກຳ, ໂຄງການໂດຍຫວຽດນາມ ໜູນຊ່ວຍ ລາວ.