ລັດຖະມົນຕີການຕ່າງປະເທດ Pham Binh Minh
ຕ້ອນຮັບເລຂາຜູ້ປະຈຳການກະຊວງການຕ່າງປະເທດສ.ສິງກະໂປ
( ພາບ: vietnamplus.vn )
(vovworld) - ໃນຂອບເຂດການຢ້ຽມຢາມຫວຽດນາມ ລະຫວ່າງວັນທີ 21 – 22/8, ຕອນບ່າຍວັນທີ 21/8, ທ່ານເລຂາຜູ້ປະຈຳການກະຊວງການຕ່າງປະເທດສ.ສິງກະໂປ Bilahari Kausikan ໄດ້ພົບປະກັບທ່ານລັດຖະມົນຕີການຕ່າງປະເທດຫວຽດນາມ Pham Binh Minh. ທີ່ການພົບປະ, ທ່ານລັດຖະມົນຕີການຕ່າງປະເທດ Pham Binh Minh ໄດ້ຕີລາຄາສູງເລື່ອງການນຳສອງປະເທດໄດ້ມີການພົບປະ, ຢ້ຽມຢາມເຊິ່ງກັນແລະ ກັນເປັນປະຈຳ, ປະກອບສ່ວນຮັດແໜ້ນຄວາມສະໜິດຕິດພັນ, ຄວາມໄວ້ເນື້ອເຊື່ອໃຈໃນການພົວພັນລະຫວ່າງສອງປະເທດ. ທ່ານເລຂາຜູ້ປະຈການຳກະຊວງການຕ່າງປະເທດ ສິງກະໂປ Bilahari Kausikan ໄດ້ຖືວ່າ, ໃນໄລຍະທີ່ຈະມາເຖິງ, ສອງປະເທດຄວນສືບຕໍ່ເພີ່ມທະວີການຮ່ວມມືໃນທຸກຂົງເຂດ: ການເມືອງ, ເສດຖະກິດ, ວັດທະນະທຳ, ສຶກສາ… ນຳການພົວພັນຫວຽດນາມ - ສິງກະໂປ ພັດທະນາຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງສອງປະເທດ ແລະ ເພື່ອການພັດທະນະາຂອງອາຊຽນ. ທ່ານ Bilahari Kausikan ໄດ້ຢືນຢັນວ່າ ຈະສົມທົບກັບຫວຽດນາມ ຢ່າງແໜ້ນແຟ້ນເພື່ອຈັດຕັ້ງບັນດາການເຄື່ອນໄຫວຢ່າງແທ້ຈິງ ແລະ ມີຄວາມໝາຍ ເພື່ອສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງສອງປະເທດໃນປີ 2013.
ເມື່ອແລກປ່ຽນກ່ຽວກັບສະພາບການໃນພາກພື້ນ ແລະ ຢູ່ໃນໂລກ, ທ່ານລັດຖະມົນຕີ Pham Binh Minh ແລະ ທ່ານເລຂາຜູ້ປະຈຳການກະຊວງການຕ່າງປະເທດ Bilahari Kausikan ໃຫ້ຄຳໝັ້ນສັນຍາຈະເພີ່ມທະວີການຮ່ວມມືໃນບັນດາເວທີປາໄສສາກົນ ແລະ ພາກພື້ນຄື ອາຊຽນ, APEC, ASEM...; ພິເສດແມ່ນເພີ່ມທະວີຄວາມສາມັກຄີ ແລະ ບົດບາດໃຈກາງຂອງອາຊຽນ, ມຸ່ງໄປເຖິງການສ້າງປະຊາຄົມອາຊຽນໃນປີ 2015; ພ້ອມກັນນັ້ນກໍ່ສືບຕໍ່ສົມທົບກັບບັນດາປະເທດອາຊຽນ ແລະ ຈີນ ໃນການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ຮຽບຮຽງປະມວນລະບຽບການກ່ຽວກັບການປະພຶດຢູ່ທະເລຕາເວັນອອກ (COC).