(vovworld) – ຕອນເຊົ້າວັນທີ 19/7, ທີ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານ ສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ຫົວໜ້າອະນຸກຳມະການເອກະສານກອງປະຊຸມໃຫຍ່ຄັ້ງທີ 12 ຂອງພັກ, ໄດ້ເປັນປະທານວາລະປະຊຸມຄົບຄະນະຂອງອະນຸກຳມະການ.
ອະນຸກຳມະການເອກະສານໄດ້ຮັບການສ້າງຕັ້ງເມື່ອວັນທີ 25/10/2013, ຕາມຂໍ້ຕົກລົງຂອງຄະນະບໍລິຫານງານສູນກາງພັກຊຸດທີ 11, ມີໜ້າທີ່ກະກຽມຮ່າງບົດລາຍງານການເມືອງ, ຮ່າງມະຕິກອງປະຊຸມໃຫຍ່ຄັ້ງທີ 12 ຂອງພັກ ແລະ ບັນດາເອກະສານອື່ນທີ່ຍື່ນສະເໜີຕໍ່ກອງປະຊຸມໃຫຍ່ຄັ້ງທີ 12 ຂອງພັກ.
ກ່າວຄຳເຫັນທີ່ວາລະປະຊຸມ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ: ກອງປະຊຸມໃຫຍ່ຄັ້ງທີ 12 ໄດ້ຈັດຕັ້ງຂຶ້ນໃນຈຸດເວລາສຳຄັນທີ່ສຸດ. ໃນສະພາບການພາຍໃນ ແລະ ຕ່າງປະເທດມີການຜັນແປໄວ, ຢ່າງສັບສົນ, ບໍ່ສາມາດຄາດຄະເນລ່ວງໜ້າໄດ້, ອັນໄດ້ວາງອອກຫຼາຍບັນຫາໃໝ່, ທັງກາລະໂອກາດ ແລະ ການທ້າທາຍ. ຫົວຂໍ້ຂອງກອງປະຊຸມໃຫຍ່ແມ່ນແນວຄິດຕົ້ນຕໍ່, ສະແດງຈຸດໝາຍພື້ນຖານທີ່ສຸດ, ໜ້າທີ່ຈຸດສຸມ, ໃນຕະຫຼອດອາຍຸການ, ກຳນົດທິດໃຫ້ແກ່ການສ້າງບັນດາເອກະສານຂອງກອງປະຊຸມໃຫຍ່, ດັ່ງນັ້ນຕ້ອງກະທັດລັດ, ຈື່ງ່າຍ, ເຂົ້າໃຈງ່າຍ, ປະຕິບັດງ່າຍ ແລະ ກວດກາງ່າຍ.
ທ່ານເລຂາທິການໃຫຍ່ສະເໜີວ່າ: ພາຍຫຼັງກອງປະຊຸມຄັ້ງນີ້, ໜ່ວຍຮຽບຮຽງຕ້ອງປະຕິບັດວຽກງານໃນທັນທີ, ຮີບດ່ວນ, ເຂັ້ມງວດກ່ວາອີກ, ຈັດຕັ້ງການພົວພັນແລກປ່ຽນ, ປຶກສາຫາລືຢ່າງລະອຽດ, ຮັບເອົາຄຳເຫັນຂອງບັນດານັກຊ່ຽວຊານ, ນັກວິທະຍາສາດ. ອະນຸກຳມະການເອກະສານກໍ່ຈະເລືອກເຟັ້ນບາງບັນຫາໃໝ່, ຫຍຸ້ງຍາກ, ສັບສົນ, ຍັງມີຄວາມເຫັນທີ່ແຕກຕ່າງກັນ... ເພື່ອປຶກສາຫາລືຢ່າງລະອຽດ, ສ້າງຄວາມເຫັນດີເຫັນພ້ອມສູງ, ຫຼັງຈາກນັ້ນຍື່ນສະເໜີຕໍ່ກົມການເມືອງ, ສູນກາງພັກ, ກອງປະຊຸມໃຫຍ່ຂອງພັກທຸກຂັ້ນປຶກສາຫາລື, ບົນພື້ນຖານຮັບເອົາຄຳເຫັນຂອງບັນດາອົງການຄະນະ, ຂະແໜງ, ທ້ອງຖີ່ນ.