(vovworld) – ວັນທີ 11/8, ຢູ່ນະຄອນ ດົງຮ່າ, ແຂວງ ກວາງຈີ້ ແລະ ແຂວງ ສະຫວັນນະເຂດ ໄດ້ຈັດຕັ້ງການສົນທະນາລະຫວ່າງຄະນະຜູ້ແທນຂັ້ນສູງ 2 ແຂວງໄລຍະ 2014 – 2016. ທີ່ການສົນທະນາ, ການນຳ 2 ແຂວງຕີລາຄາເລື່ອງປະຕິບັດເອກະສານຕົກລົງຮ່ວມມືລະຫວ່າງຄະນະຜູ້ແທນຂັ້ນສູງ 2 ແຂວງທີ່ໄດ້ຮັບການລົງນາມເມື່ອວັນທີ 19/7/2011 ຢູ່ນະຄອນ ດົງຮ່າ, ແຂວງ ກວາງຈີ້ ແລະ ເອກະສານຕີລາຄາເລື່ອງປະຕິບັດເອກະສານຕົກລົງຮ່ວມມືທີ່ເຊັນກັນເມື່ອວັນທີ 6/8/2012 ຢູ່ແຂວງສະຫວັນນະເຂດ. ຄະນະຜູ້ແທນຂັ້ນສູງ 2 ແຂວງກໍ່ໄດ້ປຶກສາຫາລືບັນດາບັນຫາທີ່ທັງ 2 ຝ່າຍຕ່າງມີຄວາມສົນໃຈ ແລະ ຂໍ້ຕົກລົງຮ່ວມມືໄລຍະ 2014 – 2016. 2 ຝ່າຍສືບຕໍ່ສ້າງເງື່ອນໄຂເພື່ອໃຫ້ບັນດາພະແນກ, ຄະນະ, ຂະແໜງການ ແລະ ອົງການຈັດຕັ້ງມະຫາຊົນຂັ້ນແຂວງ, ເມືອງ ທີ່ຕິດກັບຊາຍແດນ ແລະ ບັນດາວິສາຫະກິດພົບປະແລກປ່ຽນບົດຮຽນ ແລະ ຊ່ວຍເຫຼືອເຊິ່ງກັນ ແລະ ກັນ, ສົມທົບກັນຄົ້ນຄ້ວາບັນດາຄວາມສາມາດບົ່ມຊ້ອນ, ທ່າແຮງ, ຍຸດທະສາດພັດທະນາເສດຖະກິດ - ສັງຄົມ, ວິທະຍາສາດຂອງແຕ່ລະແຂວງເພື່ອສະເໜີກົນໄກ, ແຜນການຮ່ວມມື. 2 ຝ່າຍເຫັນດີເປັນເອກະສັນສົມທົບກັນຢ່າງແໜ້ນແຟ້ນເພື່ອຜັນຂະຫຍາຍເນື້ອໃນ “ຖະແຫຼງການຮ່ວມ” ແລະ “ຖະແຫຼງການສະຫວັນນະເຂດ” ຂອງກອງປະຊຸມຮອງລັດຖະມົນຕີການຕ່າງປະເທດ ກ່ຽວກັບການພັດທະນາແລວເສດຖະກິດ ຕາເວັນອອກ - ຕາເວັນຕົກ ຄັ້ງທີ 2, ເມື່ອວັນທີ 16/5/2013 ຢູ່ສະຫວັນນະເຂດ. 2 ຝ່າຍກໍ່ເຫັນດີເປັນເອກະສັນເພີ່ມທະວີການແລດປ່ຽນຂໍ້ມູນຂ່າວສານ, ບົດຮຽນ ແລະ ສົມທົບກັນປະຕິບັດງານລະຫວ່າງບັນດາອົງການທະຫານ, ຕຳຫຼວດ, ປ້ອງກັນຊາຍແດນ ແລະ ພະແນກພົວພັນຕ່າງປະເທດລະຫວ່າງ 2 ແຂວງກ່ວາອີກ. ພາຍຫຼັງການສົນທະນາ, ຜູ້ຕາງໜ້າການນຳ 2 ແຂວງ ໄດ້ເຊັນຂໍ້ຕົກລົງໄລຍະ 2014 – 2016.