ການເຈລະຈາຂັ້ນສູງ ຫວຽດນາມ - ໂມຊຳບິກ

ໂດຍໄດ້ຮັບຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດ ໂຕເລິມ ແລະ ພັນລະຍາ, ທ່ານປະທານາທິບໍດີ ສ.ໂມຊຳບິກ Filipe Jacinto Nyusi ແລະ ພັນລະຍາ ໄດ້ມາຢ້ຽມຢາມ ຫວຽດນາມ ຢ່າງເປັນທາງການ ໃນລະຫວ່າງ 8/9 – 10/9/2024. ຕອນເຊົ້າວັນທີ 9 ກັນຍາ, ທີ່ພິທີຕ້ອນຮັບຢ່າງເປັນທາງການຢູ່ ຮ່າໂນ້ຍ, ທ່ານເລຂາທິການໃຫຍ່, ປະທານປະເທດ ໂຕເລິມ ມີການພົບປະ ແລະ ເຈລະຈາກັບທ່ານ ປະທານາທິບໍດີ Filipe Jacinto Nyusi.

ທີ່ການເຈລະຈາ, ທ່ານເລຂາທິການໃຫຍ່, ປະທານປະເທດ ໂຕເລິມ ສະແດງຄວາມເຊື່ອໝັ້ນວ່າ ການຢ້ຽມຢາມຈະສ້າງກຳລັງໜູນໃໝ່, ຊຸກຍູ້ ແລະ ເຮັດໃຫ້ການພົວພັນສາມັກຄີ, ການຮ່ວມມື, ມິດຕະພາບທີ່ເປັນມູນເຊື້ອອັນດີງາມໃຫ້ເລິກເຊິ່ງຂຶ້ນຕື່ມ ໂດຍການນຳລຸ້ນຕ່າງໆ ແລະ ປະຊາຊົນສອງປະເທດສືບທອດ, ເພີ່ມພູນຄູນສ້າງ ແລະ ພັດທະນາຢ່າງຕໍ່ເນື່ອງ.

ສ່ວນທ່ານ ປະທານາທິບໍດີ Filipe Jacinto Nyusi ສະແດງຄວາມປະທັບໃຈຢ່າງເລິກເຊິ່ງຕໍ່ການພັດທະນາຢ່າງແຮງກໍ່ຄືອິດທິພົນຊື່ສຽງບົນເວທີສາກົນ ເຊິ່ງ ຫວຽດນາມບັນລຸໄດ້. ທ່ານປະທານາທິບໍດີ ຕີລາຄາສູງຜົນງານຂອງ ຫວຽດນາມ ໃນຂົງເຂດກະສິກຳ, ທ່ານປາດຖະໜາຢາກ ຫວຽດນາມ ໜູນຊ່ວຍ ໂມຊຳບິກ ໃນການພັດທະນາກະສິກຳ.

ສິ້ນສຸດການເຈລະຈາ, ທ່ານເລຂາທິການໃຫຍ່, ປະທານປະເທດ ໂຕເລິມ ແລະ ທ່ານປະທານາທິບໍດີ Filipe Jacinto Nyusi ເປັນສັກຂີພິຍານ ພິທີເຊັນເອກະສານຮ່ວມມືສອງສະບັບ ລວມມີ: ບົດບັນທຶກຊ່ວຍຈຳລະຫວ່າງກະຊວງອຸດສາຫະກຳ ແລະການຄ້າ ຫວຽດນາມ ແລະ ກະຊວງຊັບພະຍາກອນທຳມະຊາດແຮ່ທາດ ແລະ ພະລັງງານ ໂມຊຳບິກ ແລະ ບົດບັນທຶກຊ່ວຍຈຳການຮ່ວມມືລະຫວ່າງກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລະ ກະຊວງທະເລ, ເຂດນ້ຳພາຍໃນປະເທດ ແລະ ສິນໃນນ້ຳ ໂມຊຳບິກ.