(ພາບ: AFP/TTXVN)

   ວັນທີ 30 ສິງຫາ, ທ່ານນາງ Ursula von der Leyen ປະທານຄະນະກຳມະການ ເອີລົບ (EC)  ໄດ້ຮຽກຮ້ອງໃຫ້ ອີຢູ ຍູ້ແຮງການຜະລິດອາວຸດ ແລະ ຍົກສູງຄວາມສາມາດປ້ອງກັນຊາດຂອງກຸ່ມ, ພິເສດແມ່ນໃນສະພາບການບັນດາໄພນາບຂູ່ພູມສາດການເມືອງໄດ້ເພີ່ມຂຶ້ນ.

  ກ່າວຄຳເຫັນທີ່ເວທີປາໄສຄວາມໝັ້ນຄົງທົ່ວໂລກ GLOBESEC   ຈັດຂຶ້ນຢູ່ນະຄອນຫຼວງ Praha ຂອງ ສ.ເຊັກ, ທ່ານນາງ Ursula von der Leyen ຖືວ່າ “ການປົກປັກຮັກສາ ເອີລົບ ແມ່ນຄວາມຮັບຜິດຊອບທຳອິດ ແລະ ເໜືອກ່ວາສິ່ງໃດໝົດຂອງ ອີຢູ”, ເຖິງວ່າ ອົງການ ນາໂຕ ສືບຕໍ່ສວມບົດບາດໃຈກາງ ໃນລະບົບປ້ອງກັນລວມໝູ່. ຕາມທ່ານນາງແລ້ວ, ອີຢູ ກໍ່ຕ້ອງພັດທະນາ ແລະ ປັບປຸງກຳລັງແຮງຂອງບັນດາກົນໄກ ຫຼືຍຸດທະສາດປ້ອງກັນສະເພາະ ເພື່ອຍົກສູງຄວາມສາມາດປ້ອງກັນຊາດຂອງກຸ່ມ.